ಬಿಜೆಪಿ ಹಿರಿಯ ರಾಷ್ಟ್ರೀಯ ಧುರೀಣ ಮುರಳಿ ಮನೋಹರ ಜೋಶಿಯವರ ಸಕ್ರಿಯ ರಾಜಕೀಯ ಜೀವನಕ್ಕೆ ಅಂತ್ಯವಾಗಿದೆ.  ಅದವರ ಸ್ವ ಇಚ್ಛೆಯಿಂದಲ್ಲ, ಬಿಜೆಪಿ ನಾಯಕತ್ವದ ಸರ್ವಾಧಿಕಾರಿ ಧೋರಣೆಯಿಂದ.

 ತಾವು ಈ ಬಾರಿಯ ಲೋಕಸಭಾ ಚುನಾವಣೆಯಲ್ಲಿ ಸ್ಪರ್ಧಿಸುವುದಿಲ್ಲ ಎಂದು ಅಧಿಕೃತವಾಗಿ ಇಂದು ತಿಳಿಸಿದ್ದಾರೆ.

ಸುದ್ದಿಗಾರರಿಗೆ ಈ ವಿಷಯ ತಿಳಿಸಿದ ಮುರಳಿ ಮನೋಹರ ಜೋಶಿ, “ಎಲ್.ಕೆ ಅಡ್ವಾಣಿ ಅವರಂತೆ ನಾನೂ ಸಹ ಲೋಕಸಭಾ ಚುನಾವಣೆಗೆ ಸ್ಪರ್ಧಿಸುತ್ತಿಲ್ಲ” ಎಂದು ಸ್ಪಷ್ಟನೆ ನೀಡಿದ್ದಾರೆ.

ಈ ಬಗ್ಗೆ ಮತದಾರರಿಗೆ ಪತ್ರದ ಮೂಲಕ ಬಿಜೆಪಿಯ ಆದೇಶವನ್ನು ತಿಳಿಸಿರುವ ಜೋಶಿ ಅವರು, ಖಾನ್ಪುರದ ಪ್ರೀತಿಯ ಮತದಾರರೇ, ಭಾರತೀಯ ಜನತಾ ಪಕ್ಷ ನನಗೆ ಕಾನ್ಪುರ ಸೇರಿದಂತೆ ಯಾವುದೇ ಲೋಕಸಭಾ ಕ್ಷೇತ್ರದಿಂದಲೂ ಚುನಾವಣೆಗೆ ಸ್ಪರ್ಧಿಸಕೂಡದು ಎಂದು ಪಕ್ಷದ ಸಂಘಟನಾ ಕಾರ್ಯದರ್ಶಿ ರಾಮಲಾಲ್ ತಿಳಿಸಿದ್ದಾರೆ. ಈ ಪತ್ರ ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದೆ.

ಸದ್ಯ ಜೋಶಿ ಅವರು ಉತ್ತರ ಪ್ರದೇಶದ ಲೋಕಸಭಾ ಕ್ಷೇತ್ರ ಕಾನ್ಪುರದ ಹಾಲಿ ಸಂಸದರಾಗಿದ್ದಾರೆ. 2009ರಿಂದ 2014ರವರೆಗೆ ವಾರಾಣಸಿ ಕ್ಷೇತ್ರದ ಸಂಸದರಾಗಿದ್ದ ಜೋಶಿ ಅವರು ಪ್ರಧಾನಿ ನರೇಂದ್ರ ಅವರಿಗೆ ಈ ಕ್ಷೇತ್ರವನ್ನು ಬಿಟ್ಟುಕೊಟ್ಟು 2014ರಲ್ಲಿ ಖಾನ್ಪುರದಿಂದ ಸ್ಪರ್ಧಿಸಿ ವಿಜೇತರಾಗಿದ್ದರು.

ಬಿಜೆಪಿ ಹಿರಿಯ ಧುರೀಣ ಅಡ್ವಾಣಿ ಅವರು ಆರು ಸಲ ಸಂಸದರಾಗಿ ಆಯ್ಕೆಯಾಗಿದ್ದ ಗುಜರಾತ್ ರಾಜಧಾನಿ ಗಾಂಧೀನಗರ ಕ್ಷೇತ್ರದಲ್ಲಿಈ ಬಾರಿ ಬಿಜೆಪಿ ಅಧ್ಯಕ್ಷ ಅಮಿತ್ ಷಾ ಅವರು ಸ್ಪರ್ಧಿಸುತ್ತಿದ್ದು, ಈ ಬೆಳವಣಿಗೆಯಿಂದಾಗಿ ಚುನಾಣೆಗೆ ಸ್ಪರ್ಧಿಸದೇ ಅಡ್ವಾಣಿ ಅವರೂ ಹಿಂದೆ ಸರಿದಿದ್ದರು.

ಅಲ್ಲದೇ, ಬಿಜೆಪಿ ಬಿಡುಗಡೆಗೊಳಿಸಿದ ಲೋಕಸಭಾ ಚುನಾವಣೆಯ ಉತ್ತರ ಪ್ರದೇಶದ 40 ಸ್ಟಾರ್ ಪ್ರಚಾರಕರ ಪಟ್ಟಿಯಲ್ಲಿ ಜೋಷಿ ಹಾಗೂ ಅಡ್ವಾಣಿ ಅವರ ಹೆಸರೂ ಕಾಣೆಯಾಗಿದ್ದನ್ನು ಇಲ್ಲಿ ಸ್ಮರಿಸಬಹುದು.

ಇದೀಗ ಜೋಶಿ ಸಹ ಕಣದಿಂದ ಹಿಂಜರಿದಿರುವುದು ಬಿಜೆಪಿ ಹಿರಿಯ ಮುಖಂಡರನ್ನು ಕಡೆಗಣಿಸುತ್ತಿರುವುದು ಹಾಗೂ ತನ್ನ ಸರ್ವಾಧಿಕಾರಿತನ ತೋರುತ್ತಿರುವುದಕ್ಕೆ ಈ ಎಲ್ಲಾ ಘಟನೆಗಳು ಸಾಕ್ಷಿಯಾಗುತ್ತಿದೆ.