ಚುನಾವಣೆಯ ತೀವ್ರತೆ ಹೀಗೂ ಇರುತ್ತದೆ! “ನಿಮ್ಮ ನಿಜ ಮುಖವನ್ನು ನೋಡಿಕೊಳ್ಳಿ” ಎಂಬ ಸಂದೇಶದೊಂದಿಗೆ ಛತ್ರೀಸ್‍ ಗಡದ ಮುಖ್ಯಮಂತ್ರಿ ಭೂಪೇಶ್ ಭಗೇಲ್ ದೇಶದ ಪ್ರಧಾನಿ ನರೇಂದ್ರ ಮೋದಿಯವರಿಗೆ ಒಂದು ಕನ್ನಡಿಯನ್ನೇ ಪಾರ್ಸೆಲ್ ಮೂಲಕ ಕಳಿಸಿರುವ ಸುದ್ದಿ ಇದು.

ದೇಶದಲ್ಲಿ ಕಾಂಗ್ರೆಸ್-ಬಿಜೆಪಿಗಳ ನಡುವಿನ ವಾಗ್ವಾದ ವಾಗ್ಯುದ್ಧಗಳು ಭಿನ್ನ ಆಯಾಮ ಪಡೆಯುತ್ತಿದ್ದಂತೆ ಟೀಕೆಗಳು, ವ್ಯಂಗ್ಯಗಳು, ಕುಹಕಗಳು ತಾರಕಕ್ಕೇರುತ್ತಿವೆ. ಈ ಮಧ್ಯೆ ಪ್ರಧಾನಮಂತ್ರಿ ಮೋದಿಯವರಿಗೆ ಕನ್ನಡಿಯೊಂದನ್ನು ಕಳಿಸಿರುವ ಛತ್ತೀಸ್ಗಢದ ಮುಖ್ಯಮಂತ್ರಿ ಭೂಪೇಶ್ ಭಗೇಲ್, ಕನ್ನಡಿ ನೋಡಿಕೊಂಡು ತಮ್ಮ ನಿಜ ಮುಖವನ್ನು ಪತ್ತೆ ಹಚ್ಚಿಕೊಳ್ಳುವಂತೆ ಮೋದಿಯವರಿಗೆ ಸಲಹೆ ನೀಡಿದ್ದಾರೆ.

ದೇಶದ ಜನತೆ ಬರಲಿರುವ ಲೋಕಸಭಾ ಚುನಾವಣೆಗಳಲ್ಲಿ ಮೋದಿಯವರಿಗೆ ಕನ್ನಡಿ ತೋರಿಸಲಿದ್ದಾರೆ ಎಂದು ಭಗೇಲ್ ಪ್ರಧಾನಿಯವರಿಗೆ ಗೋಡೆ ಕನ್ನಡಿಯನ್ನು ಪಾರ್ಸೆಲ್ ಕಳಿಸಿ ಟ್ವಿಟ್ಟರ್ ನಲ್ಲಿ ಹೀಗೆ ನೀಡಿದ್ದಾರೆ.

“ನಾನು ನಿಮಗೆ ಈ ಕನ್ನಡಿಯನ್ನು ಉಡುಗೊರೆಯಾಗಿ ಕಳುಹಿಸುತ್ತಿದ್ದೇನೆ. ಈ ಕನ್ನಡಿಯೊಳಗೆ ನಿಮ್ಮನ್ನು ನೀವು ಪದೇಪದೇ ನೋಡಿಕೊಳ್ಳುತ್ತಿದ್ದರೆ ನಿಮ್ಮ ನಿಜಮುಖವನ್ನು ಗುರುತಿಸಿಕೊಳ್ಳಲು ನಿಮಗೆ ಸಾಧ್ಯವಾಗಬಹುದು. ನೀವು ಸಾಕಷ್ಟು ಕಾಲ ಕಳೆಯುವ ಲೋಕ ಕಲ್ಯಾಣ ಮಾರ್ಗದ ನಿಮ್ಮ ಮನೆಯಲ್ಲಿ ಈ ಕನ್ನಡಿಯನ್ನು ಹಾಕಿಕೊಳ್ಳಿ.” ಎಂದು ಕಾಂಗ್ರೆಸ್ ನಾಯಕ ಭಗೇಲ್ ತಮ್ಮ ಟ್ವೀಟ್ ನಲ್ಲಿ ಹೇಳಿದ್ದಾರೆ.

“ನೀವು ಈ ಕನ್ನಡಿಯನ್ನ ಬಳಸದಿರಬಹುದು. ಅದನ್ನು ಪ್ರಧಾನಿಯವರ ಗೃಹದ ಕಸದ ಬುಟ್ಟಿಯಲ್ಲಿ ಬಿಸಾಡಲೂಬಹುದು. ಆದರೆ ಈ ಕನ್ನಡಿಯನ್ನು ನೋಡುವುದರಿಂದ ತಪ್ಪಿಸಿಕೊಳ್ಳಲಾರಿರಿ. ಈ ಚುನಾವಣೆಯಲ್ಲಿ ದೇಶದ 125 ಕೋಟಿ ಜನರು ನಿಮಗೆ ಕನ್ನಡಿ ತೋರಿಸಲಿದ್ದಾರೆ… ತಾವು ಸಿದ್ಧರಿದ್ದೀರಾ ಮೋದಿಜಿ? ಎಂದು ಭೂಪೇಶ್ ಭಗೇಲ್ ಅವರು ಮತ್ತೊಂದು ಟ್ವೀಟ್ ನಲ್ಲಿ #ModiVsModi ಹ್ಯಾಶ್ ಟ್ಯಾಗ್ ಬಳಸಿ ಕೇಳಿದ್ದಾರೆ.

ಭಗೇಲ್ ಅವರು ಮೋದಿಯವರ ನೀತಿಗಳನ್ನು ಟೀಕಿಸಿ ಅವರಿಗೆ ಒಂದು ಪತ್ರವನ್ನು ಬರೆದು ತಮ್ಮ ಫೇಸ್ಬುಕ್ ಪುಟದಲ್ಲಿ ಹಾಕಿದ್ದಾರೆ. “ತಮ್ಮನ್ನು ತಾವು ಅನೇಕ ಹೆಸರುಗಳಿಂದ ಕರೆದುಕೊಂಡಿರುವುದರಿಂದ ಜನ ಮೋದಿಯವರನ್ನು ಯಾವ ಹೆಸರಿನಿಂದ ಕರೆಯಬೇಕೆಂಬ ಗೊಂದಲಕ್ಕೀಡಾಗಿದ್ದಾರೆ …. ಚಾಯ್ವಾಲಾ, ಫಕೀರ, ಚೌಕೀದಾರ, ಸಾಹೇಬ, ಹೆಸರುಗಳು ಇನ್ನೂ ಎಷ್ಟಿವೆಯೋ ಗೊತ್ತಿಲ್ಲ.” ಎಂದು ವ್ಯಂಗ್ಯವಾಡಿದ್ದಾರೆ ಛತ್ತೀಸ್ಗಢದ ಹಾಲಿ ಮುಖ್ಯಮಂತ್ರಿ.

‘ಮೋದಿಯವರು ನೀಡಿದ್ದ ಯಾವ ಆಶ್ವಾಸನೆಯೂ ಈಡೇರದೆ ಬರೀ ಜುಮ್ಲಾ (ಬೊಗಳೆ) ಆಗಿವೆ’ ಎಂದಿರುವ ಅವರು ಫ್ರಧಾನಿಯವರನ್ನು ಮತ್ತು ಅವರ ಲಕ್ಷಾಂತರ ರೂಪಾಯಿ ಬೆಲೆಬಾಳುವ ಸೂಟು, ವಿದೇಶ ಪ್ರವಾಸಗಳು, ಜಿಎಸ್ಟಿ, ಪಾಕಿಸ್ತಾನ ಮತ್ತು ಚೀನಗಳಿಗೆ ಸಂಬಂಧಪಟ್ಟ ವಿದೇಶಾಂಗ ನೀತಿ, ರಫೇಲ್ ಯುದ್ಧ ವಿಮಾನ ವ್ಯವಹಾರದ ಕುರಿತು ಹಿಗ್ಗಾಮುಗ್ಗಾ ಜಾಡಿಸಿದ್ದಾರೆ.

“ನಿಮ್ಮ ನಿಜ ಮುಖವನ್ನು ಗುರುತಿಸಲು ಜನರಿಗೆ ಆಗುತ್ತಿಲ್ಲ. ನಿಮ್ಮ ನಿಜ ಮುಖವೇನೆಂಬುದು ನಿಮಗೆ ನೆನಪಿದೆಯೇನು? ಸುಳ್ಳುಗಳ ಮತ್ತೊಂದು ಮುಖವಾಡ ಧರಿಸಿ ನೀವು ಜನರೆದುರು ಬರುವ ಮೊದಲು ನಾನು ನಿಮಗೆ ಈ ಕನ್ನಡಿಯನ್ನು ಉಡುಗೊರೆಯಾಗಿ ಕಳಿಸುತ್ತಿದ್ದೇನೆ.” ಎಂದೂ ಸಹ ಭಗೇಲ್ ಕುಟುಕಿದ್ದಾರೆ.

ಭಗೇಲ್ ಅವರನ್ನು ಅನುಸರಿಸಿರುವ ಛತ್ತೀಸ್ಗಢದ ಇತರ ಕಾಂಗ್ರೆಸ್ ನಾಯಕರು ಸಹ ರಾಜ್ಯದ ಬಿಜೆಪಿ ಮುಖಂಡರಿಗೆ ಕಾಣಿಕೆಯಾಗಿ ಕನ್ನಡಿಗಳನ್ನು ರವಾನಿಸಿದ್ದಾರೆಂದು ತಿಳಿದುಬಂದಿದೆ. ಮಾಜಿ ಪ್ರಧಾನಿ ಅಟಲ್ ಬಿಹಾರಿ ವಾಜಪೇಯಿಯವರ ಸೋದರಸೊಸೆ ಹಾಗೂ ಕಾಂಗ್ರೆಸ್ ನಾಯಕಿ ಕರುಣಾ ಶುಕ್ಲಾ ಅವರು ಮಾಜಿ ಮುಖ್ಯಮಂತ್ರಿ ರಮಣ್ ಸಿಂಗ್ ಅವರಿಗೆ ಕನ್ನಡಿಯನ್ನು ಕಳಿಸಿದ್ದಾರೆ. ಇವರಿಬ್ಬರು ಕಳೆದ ರಾಜ್ಯ ವಿಧಾನಸಭಾ ಚುನಾವಣೆಗಳಲ್ಲಿ ಪ್ರತಿಸ್ಪರ್ಧಿಗಳಾಗಿದ್ದರು. ಛತ್ತೀಸ್ಗಢ ಕಾಂಗ್ರೆಸ್ ನ ಪ್ರಚಾರ ವಿಭಾಗದ ಮುಖ್ಯಸ್ಥ ಶೈಲೇಶ್ ನಿತಿನ್ ತ್ರಿವೇದಿ ಕೂಡ ಬಿಜೆಪಿಯ ರಾಜ್ಯ ಮುಖಂಡ ವಿಕ್ರಮ್ ಉಸೆಂಡಿಯವರಿಗೆ ಕನ್ನಡಿ ಕಳುಹಿಸಿದ್ದಾರೆ.

ಛತ್ತೀಸ್ಗಢದ ಕಾಂಗ್ರೆಸ್ ನ ಕನ್ನಡಿ ಕಳಿಸುವ ಅಭಿಯಾನವನ್ನು ‘ಸಣ್ಣತನದ ರಾಜಕಾರಣ’ ಎಂದು ಟೀಕಿಸಿರುವ ಬಿಜೆಪಿ ರಾಜ್ಯ ವಕ್ತಾರ ಸಚ್ಚಿದಾನಂದ ಉಪಾಸನೆ, “ಮುಖ್ಯಮಂತ್ರಿ ಭೂಪೇಶ್ ಭಗೇಲ್ ತಮ್ಮ ಪಕ್ಷದ ಅಧ್ಯಕ್ಷ ರಾಹುಲ್ ಗಾಂಧಿಯವರಿಗೆ ಆ ಕನ್ನಡಿಯನ್ನು ಕಳುಹಿಸಬೇಕು ಮತ್ತು ಜಾಮೀನಿನ ಮೇಲೆ ಹೊರಗಿರುವ ತಾವೇ ಆ ಕನ್ನಡಿಯೊಳಗೆ ನೋಡಿಕೋಳ್ಳಬೇಕು” ಎಂದು ತಿರುಗೇಟು ನೀಡಿದ್ದಾರೆ. “ಪ್ರಧಾನಮಂತ್ರಿ ಮೋದಿಯವರಿಗೆ ಯಾರೂ ಸರಿಸಾಟಿಯಿಲ್ಲ. ಮೋದಿಯವರು ತಮ್ಮ ಕನ್ನಡಿಯನ್ನು ಕಾಂಗ್ರೆಸ್ ಗೆ ತೋರಿಸಿಯಾಗಿದೆ. ಅವರು ಕನ್ನಡಿಯನ್ನು ಭಯೋತ್ಪಾದಕರಿಗೆ ತೋರಿಸಿದ್ದಾರೆ.” ಎಂದೂ ಹೇಳಿದ್ದಾರೆ.

ಕನ್ನಡಿಗಳ ಕಾದಾಟ ಇಲ್ಲಿಗೇ ನಿಲ್ಲುವುದೇ ಅಥವಾ ಮತ ಚಲಾವಣೆಯ ವರೆಗೂ ಕನ್ನಡಿಗಳು ಒಡೆದು ಪುಡಿಪುಡಿಯಾಗಿ ಕೆಸರೆರಚಾಟದಲ್ಲಿ ನೆನೆಯುತ್ತಲಿರುವವೇ? ಕನ್ನಡಿಗಳು ಅಧಿಕಾರದ ಗದ್ದುಗೆ ಏರಿರುವವರ ಕಣ್ಣಿಗೆ ಬೀಳುತ್ತವೋ ಇಲ್ಲವೋ ಅವುಗಳನ್ನು ದೇಶದ ಜನ ಗಮನಿಸುತ್ತಿರುತ್ತಾರೆ ಎಂಬುದಂತೂ ದಿಟ…