ಆಂಧ್ರಪ್ರದೇಶದಲ್ಲಿ 372 ದೋಷಪೂರಿತ ಇವಿಎಂಗಳು ಕಂಡುಬಂದಿದೆ. ಇದರಿಂದಾಗಿಯೇ ಇಲ್ಲಿನ ಮದನಪಲ್ಲಿ, ತಂಬಲಪಟ್ಟಿ, ತಿರುಪತಿ, ಸತ್ಯವೇಡು, ರೆಣುಗುಂಟಾ ಹಾಗೂ ಇತರ ಪ್ರದೇಶಗಳಲ್ಲಿ ಮತದಾನ ಪ್ರಕ್ರಿಯೆ ಆರಂಭವಾಗಲು ವಿಳಂಬವಾಗಿದೆ.
ಮರುಚನಾವಣೆಗೆ ಚಂದ್ರಬಾಬು ನಾಯ್ಡು ಮನವಿ

ಆಂಧ್ರಪ್ರದೇಶದಲ್ಲಿಂದು ನಡೆಯುತ್ತಿರುವ ವಿಧಾನಸಭಾ ಚುನಾವಣೆ ವೇಳೆ ಹಲವು ಮತಗಟ್ಟೆಗಳ ಇವಿಎಂ ಯಂತ್ರಗಳಲ್ಲಿ ದೋಷಕಂಡುಬಂದಿದೆ. ಈ ಹಿನ್ನೆಲೆ ಮುಖ್ಯಮಂತ್ರಿ ಚಂದ್ರಬಾಬು ನಾಯ್ಡು ಇವಿಎಂಗಳಲ್ಲಿ ದೋಷ ಕಂಡುಬಂದ ಪ್ರದೇಶಗಳಲ್ಲಿ ಮರು ಚುನಾವಣೆ ನಡೆಸಲು ಚುನಾವಣಾ ಆಯುಕ್ತರಿಗೆ ಪತ್ರದ ಮೂಲಕ ಆಗ್ರಹಿಸಿದ್ದಾರೆ.

“ಇವಿಎಂಗಳಲ್ಲಿ ದೋಷಕಂಡುಬಂದ ಮತಗಟ್ಟೆ ಹಾಗೂ 9.39ಕ್ಕೆ ಮತದಾನ ಆರಂಭವಾಗದ ಮತಗಟ್ಟೆಗಳಲ್ಲಿ ಮತದಾರರು ಮತ ಹಾಕದೇ ಹಿಂದಿರುಗಿದ್ದಾರೆ. ಪುನಃ ಮತದಾನ ಪ್ರಕ್ರಿಯೆ ಆರಂಭವಾದರು ಅವರು ಮತದಾನ ಮಾಡುವುದಿಲ್ಲ. ಆದ್ದರಿಂದ ಇಂಥ ಮತಗಟ್ಟೆಗಳಲ್ಲಿ ಮರುಚುನಾವಣೆ ನಡೆಸಬೇಕು ಎಂದು ಚಂದ್ರಬಾಬು ನಾಯ್ಡು ಅವರು ಭಿನ್ನವಿಸಿದ್ದಾರೆ.

ಇವಿಎಂ ಧ್ವಂಸ

ಆಂಧ್ರಪ್ರದೇಶದ ಅನಂತಪುರದಲ್ಲಿ ಜನಸೇನಾ ಪಕ್ಷದ ಎಂಎಲ್ಎ ಅಭ್ಯರ್ಥಿ ಮತಯಂತ್ರ ಸರಿಯಾಗಿ ಕೆಲಸ ಮಾಡದಿರುವುದು ಕಂಡು ಆಕ್ರೋಶಗೊಂಡು ಇವಿಎಂ ಯಂತ್ರವನ್ನು ಎತ್ತಿಹಾಕಿ ಪುಡಿಗಟ್ಟಿದ್ದಾರೆ. ನಂತರ ಇನ್ನಷ್ಟು ಇವಿಎಂಗಳನ್ನು ನಾಶಗೊಳಿಸುವುದಾಗಿಯೂ ಬೆದರಿಕೆ ಒಡ್ಡಿದ್ದಾರೆ ಎನ್ನಲಾಗಿದೆ. ಇದೀಗ ಜನಸೇನಾ ಪಕ್ಷದ ಅಭ್ಯರ್ಥಿಯನ್ನು ಪೊಲೀಸರು ಬಂಧಿಸಿದ್ದಾರೆ ಎಂದು ಮೂಲಗಳು ತಿಳಿಸಿದೆ.

ವೈಎಸ್ಆರ್ ಕಾಂಗ್ರೆಸ್ ಪಕ್ಷದ ಕಾರ್ಯಕರ್ತರ ಬಂಧನ

ರಾಯಲಸೀಮೆಯ ಗೊಂತುವರಿಪಲ್ಲಿ ಗ್ರಾಮದಲ್ಲಿ ಜಗನ್ ಮೋಹನ್ ರೆಡ್ಡಿಯ ವೈಎಸ್ಆರ್ ಕಾಂಗ್ರೆಸ್ ಪಕ್ಷದ ಕಾರ್ಯಕರ್ತರು ರಿಗ್ಗಿಂಗ್ ನಡೆಸಿದ ಆರೋಪದ ಹಿನ್ನೆಲೆಯಲ್ಲಿ ಪೊಲೀಸರು ಹಲವರನ್ನು ಬಂಧಿಸಿದ್ದಾರೆ.
ಟಿಡಿಪಿ ಕಾರ್ಯಕರ್ತರ ಜತೆ 80-20 ಹಂಚಿಕೆಯಂತೆ ಒಳಸಂಚು ರೂಪಿಸುತ್ತಿದ್ದ ಹಿನ್ನೆಲೆ ಹಾಗೂ ಮತದಾನ ಕಚೇರಿಯ ಬಾಗಿಲನ್ನು ಬಂದ್ ಮಾಡಿದ ಆರೋಪದ ಮೇಲೆ ಪೊಲೀಸರು ಬಂಧಿಸಿದ್ದಾರೆ ಎನ್ನಲಾಗಿದೆ.

ಪಶ್ಚಿಮ ಗೋದಾವರಿ ಜಿಲ್ಲೆಯ ಶನಿವೆರಪುಪೇಟಾ ಗ್ರಾಮದ ವೈಎಸ್ಆರ್ ಪಿ ನಾಯಕ ಮಟ್ಟ ರಾಜು ಮೇಲೆ ಟಿಡಿಪಿ ಕಾರ್ಯಕರ್ತರು ಮತಗಟ್ಟೆಯೊಂದರ ಮುಂದೆಯೇ ಹಲ್ಲೆ ನಡೆಸಿದ್ದಾರೆ ಎಂದು ವರದಿಯಾಗಿದೆ.

ಒಡಿಶಾ, ಅರುಣಾಚಲ ಪ್ರದೇಶ, ಸಿಕ್ಕಿಂ

ಒಡಿಶಾದಲ್ಲಿ ಬೆಳಗಿನಿಂದ 11ಗಂಟೆಯವರೆಗೆ ಶೇಕಡಾ 22ರಷ್ಟು ಮತ್ತು ಅರುಣಾಚಲ ಪ್ರದೇಶದಲ್ಲಿ ಶೇಕಡಾ 27.48ರಷ್ಟು
ಮತದಾನವಾಗಿದೆ ಎಂದು ಮುಖ್ಯ ಚುನಾವಣಾ ಅಧಿಕಾರಿ ತಿಳಿಸಿದ್ದಾರೆ.