ಮುಂಬಯಿ ಉತ್ತರ ಕ್ಷೇತ್ರದ ಕಾಂಗ್ರೆಸ್ ಅಭ್ಯರ್ಥಿ ಹಾಗೂ ಬಾಲಿವುಡ್ ನಟಿ ಊರ್ಮಿಳಾ ಮಾತೊಂಡ್ಕರ್ ಅವರು ಪೊಲೀಸ್ ಭದ್ರತೆಗಾಗಿ ಕೋರಿಕೆ ಸಲ್ಲಿಸಿದ್ದು ಇದೀಗ ಭದ್ರತೆ ಒದಗಿಸಲಾಗಿದೆ ಎಂದು ಮುಂಬಯಿ ಪೊಲೀಸರು ತಿಳಿಸಿದ್ದಾರೆ. ಸೋಮವಾರದಂದು ಅವರು ಮುಂಬಯಿಯ ಕರಾವಳಿ ಉಪನಗರದಲ್ಲಿ ಪ್ರಚಾರ ನಡೆಸುತ್ತಿದ್ದಾಗ, ಕಾಂಗ್ರೆಸ್ ಮತ್ತು ಬಿಜೆಪಿ ಬೆಂಬಲಿಗರ ಮಧ್ಯೆ ಗಲಾಟೆ ಸಂಭವಿಸಿತ್ತೆಂದು ಹೇಳಲಾಗಿದೆ. ಈ ಘಟನೆಯ ನಂತರ ಅವರು ಪೊಲೀಸ್ ಭದ್ರತೆಗೆ ಕೋರಿದ್ದರೆಂದು ತಿಳಿದುಬಂದಿದೆ.

“ಭಯ ಹುಟ್ಟಿಸಲೆಂದೇ ಅವರು ಹೀಗೆ ವರ್ತಿಸುತ್ತಿದ್ದಾರೆ. ಇದು ಆರಂಭವಷ್ಟೇ ಆಗಿದ್ದು ಇನ್ನು ಮುಂದೆ ಹಿಂಸಾತ್ಮಕ ತಿರುವನ್ನು ಪಡೆಯಲು ಸಾಧ್ಯವಿದೆ. ನನಗೆ ಜೀವ ಬೆದರಿಕೆ ಇರುವುದರಿಂದ ಪೊಲೀಸ್ ಭದ್ರತೆಗಾಗಿ ಆಗ್ರಹಿಸಿ ನಾನು ದೂರು ದಾಖಲಿಸಿದ್ದೇನೆ” ಎಂದು ಊರ್ಮಿಳಾ ಎಎನ್‌ಐ ಸುದ್ದಿಸಂಸ್ಥೆಗೆ ತಿಳಿಸಿದ್ದರು.

ಬೋರಿವಾಲಿ ರೈಲು ನಿಲ್ದಾಣದ ಹೊರಗೆ ಅವರು ಪ್ರಚಾರ ಕೈಗೊಳ್ಳುತ್ತಿರುವಾಗ ಕೆಲವರು ಮೋದಿ ಮೋದಿ ಎಂದು ಕೂಗಾಡಲು ಆರಂಭಿಸಿ ಕಾಂಗ್ರೆಸ್ ಕಾರ್ಯಕರ್ತರ ಜೊತೆ ಜಗಳಕ್ಕಿಳಿದರೆಂದು ಮತ್ತು ಕ್ಷಣದಲ್ಲೇ ಎರಡೂ ಗುಂಪುಗಳ ನಡುವೆ ಘರ್ಷಣೆ ಉಂಟಾಯಿತೆಂದು ಹೇಳಲಾಗಿದೆ. ನಂತರ ಊರ್ಮಿಳಾ ಸ್ಥಳೀಯ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ.

ನಾವು ಶಾಂತಿಯುತವಾಗಿ ಸಾರ್ವಜನಿಕರನ್ನು ಉದ್ದೇಶಿಸಿ ಮಾತನಾಡುತ್ತಿದ್ದೆವು. ಆಗ ಅಲ್ಲೇ ಎಲ್ಲಿಂದಲೋ 15-20 ಜನರು ಬಂದು ಘೋಷಣೆಗಳನ್ನು ಕೂಗಲು ಶುರು ಮಾಡಿದರು. ನಾನು ಅದಕ್ಕೆ ಪ್ರತಿಕ್ರಿಯೆ ನೀಡಲಿಲ್ಲ. ಇಂತಹ ಘಟನೆಗಳು ನಡೆಯುವುದು ಸಹಜವೆಂದು ಭಾವಿಸಿ ನಾನು ಹಾಗೇ ಸುಮ್ಮನಾಗಲು ಬಿಟ್ಟುಬಿಡಿ ಎಂದು ನಮ್ಮವರಿಗೆ ಸಂಜ್ಞೆ ಮಾಡಿದೆ. ಆದರೆ ಅವರೆಲ್ಲರೂ ಅಸಭ್ಯ ಭಾಷೆ ಬಳಸಿ ಅಶ್ಲೀಲವಾಗಿ ಕುಣಿಯಲು ಆರಂಭಿಸಿದರು. ಬಹುಶಃ ಅವರು ನಮ್ಮ ಜೊತೆ ಓಡಾಡುತ್ತಿದ್ದ ಮಹಿಳೆಯರಿಗೆ ಬೆದರಿಕೆ ಒಡ್ಡಬೇಕೆಂದು ಬಯಸಿದ್ದರೋ ಏನೊ. ಆಗ ಘರ್ಷಣೆ ಸಂಭವಿಸಿ ಅವರು ಮಹಿಳೆಯರ ಮೇಲೂ ಹಲ್ಲೆಗೈದರು. ಅವರದ್ದು ದ್ವೇಷದ ರಾಜಕಾರಣವೆಂದು ನಾನು ಮೊದಲ ದಿನದಿಂದಲೂ ಹೇಳುತ್ತಿದ್ದೇನೆ. ಇದು ಮುಂಬಯಿಯಲ್ಲಿ ನಡೆಯಲು ನಾನು ಬಿಡುವುದಿಲ್ಲ ಎಂದು ಎಎನ್‌ಐ ಸುದ್ದಿ ಸಂಸ್ಥೆಯ ಜೊತೆ ಊರ್ಮಿಳಾ ಮಟೊಂಡ್ಕರ್ ಹೇಳಿಕೊಂಡಿದ್ದಾರೆ.

ಊರ್ಮಿಳಾ ಅವರು ಈ ಕೆಳಗಿನಂತೆ ಟ್ವೀಟ್ ಮಾಡಿದ್ದಾರೆ.

“ಬಿಜೆಪಿ ಕಾರ್ಯಕರ್ತರು ನೀತಿ ಸಂಹಿತೆಯನ್ನು ಕಣ್ಣಿಗೆ ರಾಚುವಂತೆ ಉಲ್ಲಂಘಿಸಿ ದ್ವೇಷಮಯ ಕೃತ್ಯಗಳಲ್ಲಿ ಭಾಗಿಯಾಗಿರುವುದನ್ನು ನೋಡಿ ಆಘಾತವಾಗುತ್ತಿದೆ… ನನ್ನ ಸುರಕ್ಷತೆಗಾಗಿ ಮತ್ತು ನನ್ನ ಮಹಿಳಾ ಬೆಂಬಲಿಗರ ಘನತೆ ಉಳಿಸಲು ಪೊಲೀಸರಲ್ಲಿ ದೂರು ದಾಖಲಿಸಬೇಕಾಯಿತು”

ಮುಂಬಯಿ ಉತ್ತರ ಮತಕ್ಷೇತ್ರದಿಂದ ಬಿಜೆಪಿ ಅಭ್ಯರ್ಥಿಯಾಗಿರುವ ಗೋಪಾಲ ಶೆಟ್ಟಿಯವರು, ಘೋಷಣೆಗಳನ್ನು ಕೂಗಿದ ಜನ ತಮ್ಮ ಕಾರ್ಯಕರ್ತರಲ್ಲವೆಂದೂ ಆದರೆ ಪ್ರಧಾನಿ ಮೋದಿಯವರನ್ನು ಬೆಂಬಲಿಸುವ ಪ್ರಯಾಣಿಕರೆಂದೂ ಹೇಳಿದ್ದಾರೆ. ಕಾಂಗ್ರೆಸ್ ಮತ್ತು ಬಿಜೆಪಿಗಳಂತೆ ಜನತೆಗೂ ಪ್ರಚಾರ ಮಾಡುವ ಹಕ್ಕಿದೆ. ಮೋದಿಯವರನ್ನು ಹೊಗಳುವ ಜನ ಅವರ ಹೆಸರು ಹಿಡಿದು ಘೋಷಣೆ ಕೂಗಿದರೆ ನಾವೇನು ಮಾಡಲು ಸಾಧ್ಯ? ಎಂದು ಅವರು ಪಿಟಿಐ ಸಂಸ್ಥೆಗೆ ಹೇಳಿದ್ದಾರೆ.

ಪಿಟಿಐ ಜೊತೆ ಮಾತನಾಡಿದ ಮುಂಬಯಿ ಪೊಲೀಸ್ ಉಪ ಆಯುಕ್ತ (ವಲಯ 11) ಸಂಗ್ರಾಮ ಸಿಂಗ್ ನಿಶಾಂದಾರ್, ಚುನಾವಣೆಗಳು ಮುಗಿಯುವವರೆಗೂ ಊರ್ಮಿಳಾ ಮಾತೊಂಡ್ಕರ್ ಅವರಿಗೆ ಪೊಲೀಸ್ ಭದ್ರತೆ ಒದಗಿಸಲಾಗುವುದೆಂದು ತಿಳಿಸಿದ್ದಾರೆ. ಆದರೆ ಊರ್ಮಿಳಾ ಆರೋಪಿಸಿದಂತೆ ಗಲಾಟೆಯಲ್ಲಿ ಭಾಗಿಯಾಗಿದ್ದು ಬಿಜೆಪಿ ಬೆಂಬಲಿಗರೆಂದು ಹೇಳಲು ಯಾವುದೇ ಸಾಕ್ಷ್ಯಾಧಾರ ಇಲ್ಲವೆಂದೂ ಈ ಘಟನೆಯಲ್ಲಿ ಭಾಗಿಯಾಗಿದ್ದವರು ಪ್ರಯಾಣಿಕರೆಂದು ಮಾತ್ರ ಹೇಳಬಹುದಾಗಿ ತಿಳಿಸಿದ್ದಾರೆ.

ಈ ಘಟನೆಯ ಕುರಿತು ಚುನಾವಣಾ ಆಯೋಗಕ್ಕೆ ದೂರು ಸಲ್ಲಿಸುವ ಆಲೋಚನೆ ಮಾಡುತ್ತಿರುವುದಾಗಿಯೂ ಕಾಂಗ್ರೆಸ್ ಅಭ್ಯರ್ಥಿ ಊರ್ಮಿಳಾ ತಿಳಿಸಿದ್ದಾರೆ. ರ‍್ಯಾಲಿಯಲ್ಲಿ ನುಗ್ಗಿದವರು ಸಾರ್ವಜನಿಕರಲ್ಲ, ಬಿಜೆಪಿ ಕಾರ್ಯಕರ್ತರೇ. ಸಾಮಾನ್ಯ ಜನರು ಇವರಂತೆ ಹಿಂಸಾತ್ಮಕ ಮಾರ್ಗಗಳಲ್ಲಿ ನಡೆದುಕೊಳ್ಳುವುದಿಲ್ಲ ಎಂದೂ ಅವರು ಆಪಾದಿಸಿದ್ದಾರೆ.

45ರ ಹರೆಯದ ಮುಂಬಯಿ ನಿವಾಸಿ ಊರ್ಮಿಳಾ ಮಾತೊಂಡ್ಕರ್ ಕಳೆದ ತಿಂಗಳು ಕಾಂಗ್ರೆಸ್ ಪಕ್ಷಕ್ಕೆ ಸೇರ್ಪಡೆಯಾಗಿದ್ದರು. ತಾನು ಬಹುಕಾಲದಿಂದ ಅಲ್ಲೇ ಇದ್ದವಳೆಂದೂ ದ್ವೇಷದ ರಾಜಕಾರಣದ ವಿರುದ್ಧ ಹೋರಾಡಲು ಬಯಸುವುದಾಗಿ ಅವರು ತಿಳಿಸಿದ್ದಾರೆ. ನಾನು ಸಕ್ರಿಯ ರಾಜಕಾರಣದಲ್ಲಿ ಮೊದಲ ಹೆಜ್ಜೆ ಇಡುತ್ತಿದ್ದೇನೆ. ಮಹಾತ್ಮಾ ಗಾಂಧಿ, ಜವಾಹರಲಾಲ ನೆಹರು ಮತ್ತು ಸರದಾರ ಪಟೇಲ್ ಅವರುಗಳ ಸಿದ್ಧಾಂತಗಳನ್ನು ಆಧರಿಸಿ ರಾಜಕೀಯ ನಿಲುವುಗಳನ್ನು ರೂಪಿಸಿಕೊಂಡಿರುವ ಕುಟುಂಬಕ್ಕೆ ಸೇರಿದ್ದೇನೆ. ಶೈಕ್ಷಣಿಕ ಪ್ರವೃತ್ತಿ ಹೊಂದಿರುವ ಕುಟುಂಬವಾದರೂ ಸಹ ನಾನು ಸಿನಿಮಾಗಳಲ್ಲಿ ಅಭಿನಯಿಸಿದೆ ಎಂಬುದು ಬೇರೆ ವಿಷಯ. ಆದರೆ ನಾನು ಬಾಲ್ಯದಿಂದಲೂ ಸಾಮಾಜಿಕ ಜಾಗೃತಿ ಹೊಂದಿದ್ದೆ ಎಂದು ಹಿಂದಿ ಸಿನಿಮಾ ತಾರೆ ಊರ್ಮಿಳಾ ಮಾತೊಂಡ್ಕರ್ ಕಾಂಗ್ರೆಸ್ ಪಕ್ಷ ಸೇರ್ಪಡೆಯಾದ ಸಂದರ್ಭದಲ್ಲಿ ಹೇಳಿದ್ದರು.

ಮುಂಬಯಿ ಉತ್ತರ ಕ್ಷೇತ್ರದಲ್ಲಿ ಮಹಾರಾಷ್ಟ್ರದ ಇತರ 17 ಮತಕ್ಷೇತ್ರಗಳಂತೆ ಏಪ್ರಿಲ್ 29ರಂದು ಮತದಾನ ನಡೆಯಲಿದ್ದು ಇದು ಮಹಾಚುನಾವಣೆಗಳ ನಾಲ್ಕನೇ ಹಂತದ ಮತದಾನವಾಗಲಿದೆ. ಫಲಿತಾಂಶಗಳು ದೇಶಾದ್ಯಂತ ಮೇ 23ರಂದು ಘೋಷಣೆಯಾಗಲಿವೆ.