ನವದೆಹಲಿ: ‘ಬಿಜೆಪಿ ಎಂದಿಗೂ ದಲಿತ ವಿರೋಧಿಯೇ. ಪಕ್ಷದಲ್ಲಿ ಕಿವುಡರಾಗಿ, ಮೂಕರಾಗಿ ಇರುವ ಯಾರು ಬೇಕಾದರೂ ಪ್ರಧಾನ ಮಂತ್ರಿಯಾಗಬಹುದು ಎಂದು’ ಬಿಜೆಪಿಯ ಸಂಸದ ಉದಿತ್ ರಾಜ್ ಆರೋಪಿಸಿದ್ದಾರೆ.
“ಉದಿತ್ ರಾಜ್ ಅವರನ್ನು ಕಾಂಗ್ರೆಸ್ ಪಕ್ಷಕ್ಕೆ ಸ್ವಾಗತಿಸಿದ ಅಧ್ಯಕ್ಷ ರಾಹುಲ್ ಗಾಂಧಿ,’’ ಎಂದು ಕಾಂಗ್ರೆಸ್ ಟ್ವೀಟ್ ಮಾಡಿದೆ.

ಭಾರತೀಯ ಕಂದಾಯ ಸೇವಾ (ಐಆರ್ ಎಸ್) ಅಧಿಕಾರಿಯಾಗಿದ್ದ ಉದಿತ್ ರಾಜ್ ಅವರು ದೇಶದಲ್ಲಿ ದಲಿತ ಹಕ್ಕುಗಳ ಧ್ವನಿ ಎತ್ತುವ ಪ್ರಮುಖ ವ್ಯಕ್ತಿಗಳಲ್ಲಿ ಒಬ್ಬರಾಗಿದ್ದಾರೆ.

“ನಾನು ಎಂದಿಗೂ ಬಿಜೆಪಿಯ ಸಿದ್ಧಾಂತಗಳನ್ನು ವಿರೋಧಿಸುತ್ತಿದ್ದೆ,’’ ಎಂದೂ ಉದಿತ್ ರಾಜ್ ಬಿಜೆಪಿ ವಿರುದ್ಧ ಹೇಳಿಕೆ ನೀಡಿದ್ದಾರೆ.
“ಒಂದು ವಿಷಯವಂತೂ ಸ್ಪಷ್ಟ ಬಿಜೆಪಿ ಎಂದಿಗೂ ದಲಿತ ವಿರೋಧಿಯೇ. ನನ್ನ ತಪ್ಪೆಂದರೆ ನಾನು ಕಿವುಡ ಅಥವಾ ಮೂಕನಾಗಿ ಇರಲಿಲ್ಲ. ಪಕ್ಷದಲ್ಲಿ ಕಿವುಡ, ಮೂಕರಾಗಿ ಇರುವ ಯಾರು ಬೇಕಾದರೂ ಪ್ರಧಾನ ಮಂತ್ರಿಯಾಗಬಹುದು,’’ ಎಂದು ಉದಿತ್ ರಾಜ್ ಬಿಜೆಪಿ ಮತ್ತು ಮೋದಿ ಕುರಿತು ವಾಗ್ದಾಳಿ ನಡೆಸಿದ್ದಾರೆ.
ತನ್ನನ್ನು ಪಕ್ಷ ನಿರ್ಲಕ್ಷಿಸಲಿದೆ ಎಂಬುದನ್ನು ಮೊದಲೇ ಊಹಿಸಿದ್ದ ಉದಿತ್ ಅವರು, ಮಂಗಳವಾರ ಬೆಳಗ್ಗೆ ಪಿನ್ ಮಾಡಿರುವ ಟ್ವೀಟ್ ನಲ್ಲಿ” ನಾನು ಟಿಕೆಟ್ ಗಾಗಿ ಕಾದಿದ್ದೇನೆ, ನನಗೆ ಟಿಕೆಟ್ ಸಿಗದಿದ್ದರೆ, ಪಕ್ಷವನ್ನು ತ್ಯಜಿಸಲಿದ್ದೇನೆ,’’ ಎಂದಿದ್ದರು.
“ನನ್ನ ಕ್ಷೇತ್ರದಿಂದಲೇ ನಾನು ನಾಮಪ್ರ ಸಲ್ಲಿಸುತ್ತೇನೆ ಎಂದು ನನಗೆ ಈಗಲೂ ನಂಬಿಕೆ ಇದೆ. ಸಾಕಷ್ಟು ಶ್ರಮಪಟ್ಟು ಕೆಲಸ ಮಾಡಿದ್ದೇನೆ , ನನ್ನ ಶಕ್ತಿಯನ್ನು ಬಿಜೆಪಿಗೆ ತೋರ್ಪಡಿಸಿದ್ದೇನೆ. ಬಿಜೆಪಿ ಪಕ್ಷವನ್ನು ಬಿಟ್ಟು ಹೋಗುವಂತೆ ಬಿಜೆಪಿ ಮಾಡುವುದಿಲ್ಲ ಎಂಬ ಬಗ್ಗೆಯೂ ನನಗೆ ನಂಬಿಕೆ ಇದೆ,’’ ಎಂದೂ ಟ್ವೀಟ್ ಮಾಡಿದ್ದರು.

ಬಿಜೆಪಿ ಪಕ್ಷಕ್ಕೆ ಸೇರಿದ ಬಗ್ಗೆ ಇಂದಿಗೂ ವಿಷಾದವಿದೆ ಎಂದಿರುವ ಉದಿತ್ ರಾಜ್, “ಬಿಜೆಪಿಯೊಂದಿಗೆ ನನ್ನ ಇಂಡಿಯನ್ ಜಸ್ಟೀಸ್ ಪಾರ್ಟಿಯನ್ನು ವಿಲೀನ ಮಾಡಿದ್ದಕ್ಕೆ ನಾನು ಇಂದಿಗೂ ವಿಷಾದಿಸುತ್ತೇನೆ. ರಾಹುಲ್ ಗಾಂಧಿ ಅವರೊಮ್ಮೆ ಸಂಸತ್ ನಲ್ಲಿ ಭೇಟಿ ಮಾಡಿ, ಉತ್ತಮವಾದ ವ್ಯಕ್ತಿಯೊಬ್ಬ, ತಪ್ಪಾದ ಪಕ್ಷದಲ್ಲಿದ್ದೀರಿ ಎಂದಿದ್ದರು. ಎಎಪಿ ವರಿಷ್ಠಅರವಿಂದ್ ಕೇಜ್ರಿವಾಲ್ ಅವರು ಇಂದು ಬೆಳಗ್ಗೆ ಭೇಟಿಯಾಗಿ 4 ತಿಂಗಳ ಹಿಂದೆಯೇ “ನಿಮಗೆ ಟಿಕೆಟ್ ನೀಡುವುದಿಲ್ಲ,’’ ಎಂದು ಹೇಳಿದ್ದನ್ನು ಸ್ಮರಿಸಿದರು. ಆಗ ಇವರ ಮಾತನ್ನು ಕೇಳದಿದ್ದಕ್ಕೆ ನನಗೆ ಈಗ ವಿಷಾದವೆನಿಸುತ್ತಿದೆ.’’ ಎಂದು ಬೇಸರದ ನುಡಿಗಳನ್ನಾಡಿದ್ದಾರೆ.
ಉದಿತ್ ರಾಜ್ ಅವರು ಬಿಜೆಪಿ ತ್ಯಜಿಸಿ ಕಾಂಗ್ರೆಸ್ ಸೇರುವ ನಿರ್ಧಾರವನ್ನು ಎಷ್ಟು ತರಾತುರಿಯಲ್ಲಿ ಮಾಡಿದ್ದರೆಂದರೆ, ಉದಿತ್ ಬಿಜೆಪಿ ಬಿಟ್ಟು ಕಾಂಗ್ರೆಸ್ ಸೇರುವ ಬಗ್ಗೆ ಅಧಿಕೃತವಾಗಿ ಟ್ವಿಟ್ಟರ್ ನಲ್ಲಿ ಪ್ರಕಟಿಸಿದಾಗಲೂ ಉದಿತ್ ರಾಜ್ ಅವರ ಹೆಸರಿನ ಹಿಂದಿದ್ದ ನಾಮವಿಶೇಷಣ “ಚೌಕಿದಾರ್” ಹಾಗೆಯೇ ಇತ್ತು.
ನಂತರ ಕಾಂಗ್ರೆಸ್ ಪ್ರಧಾನ ಕಚೇರಿಯಲ್ಲಿ ಮೊದಲ ಸುದ್ದಿಗೋಷ್ಠಿ ನಡೆಸುವ ವೇಳೆಗೆ “ಚೌಕಿದಾರ್’’ ತೆಗೆದು ಹಾಕಲಾಗಿತ್ತು.
ಅಂತಿಮವಾಗಿ ಬಿಜೆಪಿಯು ಉದಿತ್ ರಾಜ್ ಅವರ ಬದಲಾಗಿ ವಾಯುವ್ಯ ದೆಹಲಿಗೆ ಗಾಯಕಿ ಹನ್ಸ್ ರಾಜ್ ಹನ್ಸ್ ಅವರನ್ನು ಅಭ್ಯರ್ಥಿಯನ್ನಾಗಿ ಮಂಗಳವಾರ ಘೋಷಿಸಿದೆ.
ಇಂದು ಎಐಸಿಸಿ ನಡೆಸಿದ ಸುದ್ದಿಗೋಷ್ಠಿಯಲ್ಲಿ ಕಾಂಗ್ರೆಸ್ ವಕ್ತಾರ ರಣದೀಪ್ ಸಿಂಗ್ ಸುರ್ಜೇವಾಲಾ ಹಾಗೂ ಕಾಂಗ್ರೆಸ್ ಪ್ರಧಾನ ಕಾರ್ಯದರ್ಶಿ ವೇಣುಗೋಪಾಲ್ ಅವರು ಉದಿತ್ ರಾಜಜ್ ಕಾಂಗ್ರೆಸ್ ಸೇರ್ಪಡೆ ಕುರಿತು ಅಧಿಕೃತವಾಗಿ ಘೋಷಿಸಿದರು.

ಉದಿತ್ ರಾಜ್ ರಾಜಕೀಯ ಹಿನ್ನೆಲೆ

1988ರಲ್ಲಿ ಭಾರತೀಯ ಕಂದಾಯ ಸೇವೆ ಅಧಿಕಾರಿಯಾಗಿ ನೇಮಕವಾದ ಉದಿತ್ ಅವರು, ದೆಹಲಿಯ ಕಂದಾಯ ಇಲಾಖೆಯ ಹೆಚ್ಚುವರಿ ಆಯುಕ್ತರಾಗಿ ಸೇವೆ ಸಲ್ಲಿಸುತ್ತಿದ್ದರು, ಈ ವೇಳೆಯೇ 2003ರಲ್ಲಿ ಸ್ವಯಂ ನಿವೃತ್ತಿ ಪಡೆದು ಇಂಡಿಯನ್ ಜಸ್ಟೀಸ್ ಪಕ್ಷವನ್ನು ಸ್ಥಾಪಿಸಿದರು.
ಎಸ್ ಸಿ/ ಎಸ್ ಟಿ ಸಂಘದ ರಾಷ್ಟ್ರೀಯ ಅಧ್ಯಕ್ಷರಾಗಿರುವ ಉದಿತ್ ರಾಜ್ ಅಲ್ಪಸಂಖ್ಯಾತರು ಹಾಗೂ ಎಸ್ ಸಿ/ ಎಸ್ ಟಿ ಸಮುದಾಯಗಳ ಪರ ಸಾಕಷ್ಟು ಹೋರಾಟ ನಡೆಸಿದ್ದರು. ಅಲ್ಲದೇ, ಅವರು ಕೆಲವು ಪುಸ್ತಕಗಳನ್ನೂ ಬರೆದಿದ್ದಾರೆ.
2014ರ ಲೋಕಸಭಾ ಚುನಾವಣೆಗೂ ಮುನ್ನವೇ ಬಿಜೆಪಿಯಿಂದ ಟಿಕೆಟ್ ಪಡೆದು ತಮ್ಮ ಇಂಡಿಯನ್ ಜಸ್ಟೀಸ್ ಪಕ್ಷವನ್ನು 2014ರಲ್ಲಿ ಬಿಜೆಪಿ ಜತೆ ವಿಲೀನಗೊಳಿಸಿ, ವಾಯುವ್ಯ ದೆಹಲಿಯಿಂದ ಸ್ಪರ್ಧಿಸಿ ಉದಿತ್ ಅವರು ಮೊದಲ ಭಾರಿ ಸಂಸದಾಗಿ ಆಯ್ಕೆಯಾಗಿದ್ದರು.
ತಮ್ಮ ಹೋರಾಟದುದ್ದ್ದಕ್ಕೂ ಬಿಜೆಪಿಯನ್ನು ಖಂಡಿಸುತ್ತಿದ್ದ ಉದಿತ್ ಅವರು 2014ರಲ್ಲಿ ಬಿಜೆಪಿ ಲೋಕಸಭಾ ಅಭ್ಯರ್ಥಿಯಾಗಿ ಟಿಕೆಟ್ ಆಮಿಷಕ್ಕೆ ಒಳಗಾಗಿ ಇಂಡಿಯನ್ ಜಸ್ಟೀಸ್ ಪಕ್ಷವನ್ನು ಬಿಜೆಪಿ ಜತೆ ವಿಲೀನಗೊಳಿಸಿದರು. ಅಲ್ಲದೇ “ಬಿಜೆಪಿಯಲ್ಲಿ ದಲಿತರಿಗೆ ಉತ್ತಮ ಭವಿಷ್ಯವಿದೆ,’’ ಎಂದೂ ಹೇಳಿದ್ದರು.