ಮಗು ನೋವಿನಿಂದ ಬಿಕ್ಕುತ್ತದೆ;

ಅಮ್ಮಾ, ನನ್ನ ಬಿಗಿಯಾಗಿ ಅಪ್ಪಿಕೋ

ನನಗೆ ಚಳಿಯಾಗುತ್ತಿದೆ ನೋಡು.

ಅಮ್ಮ ಹೇಳುತ್ತಾಳೆ ಅವಳಿಗೆ;

ಅದು ಚಳಿಯಲ್ಲಾ ಕಂದ

ತಣ್ಣನೆಯ ಅನುಭವ, ಹಿಮಬಿಳಲಿನಿಂದ.

ಮಗು ಹಲುಬುತ್ತದೆ;

ಅಮ್ಮಾ, ನನ್ನ ಬಿಗಿಯಾಗಿ ಅಪ್ಪಿಕೋ

ಈ ರಾತ್ರಿಯ ಕತ್ತಲು ಹೆಚ್ಚಾಗಿದೆ ಎಂದಿಗಿಂತಲೂ.

ಅಮ್ಮ ಹೇಳುತ್ತಾಳೆ ಅವಳಿಗೆ;

ಕಂದಾ, ಕತ್ತಲೆಗೆ ಕಾರಣ ರಾತ್ರಿಯಲ್ಲಾ,

ಇರುವುದು ಸುಟ್ಟ ಕಲ್ಲಿದ್ದಲು ಹಳ್ಳಿಯ ಸುತ್ತಲ್ಲೆಲ್ಲಾ.

ಮಗು ಪಿಸುಗುಡುತ್ತದೆ;

ಅಮ್ಮಾ, ನನ್ನ ಬಿಗಿಯಾಗಿ ಅಪ್ಪಿಕೋ

ಅಲೆಗಳ ಭೋರ್ಗರೆತದಲಿ ನನ್ನ ಬಾಯಾರುವುದು.

ಅಮ್ಮ ಹೇಳುತ್ತಾಳೆ ಅವಳಿಗೆ;

ಭೋರ್ಗರೆಯುತಿರುವುದು ಜೀಲಂ ಅಲ್ಲವದು

ವ್ಯಾಕುಲಗೊಂಡ ವೆರಿನಾಗ್ * ಚಿಮ್ಮುತ್ತಿದೆ.

ಮಗು ಕಿರುಚುತ್ತದೆ;

ಅಮ್ಮಾ, ನನ್ನ ಬಿಗಿಯಾಗಿ ಅಪ್ಪಿಕೋ

ನಾ ಉಸಿರಾಡಲಾರೆ.

ಅಮ್ಮ ಹೇಳುತ್ತಾಳೆ ಅವಳಿಗೆ;

ಗಾಳಿಯಲ್ಲಿ ಇಲ್ಲ ಮಗು ಧೂಳು,

ಅದು ನಿನ್ನ ಕುತ್ತಿಗೆ ಹಿಸುಕುತ್ತಿರುವ ಬೂಟುಗಾಲು!

ಮಗು ನಿಟ್ಟಿಸಿರು ಬಿಡುತ್ತದೆ;

ಅಮ್ಮಾ, ನನ್ನ ಬಿಗಿಯಾಗಿ ಅಪ್ಪಿಕೋ

ನಾ ಚಲಿಸಲಾರೆ.

ಅಮ್ಮ ಹೇಳುತ್ತಾಳೆ ಅವಳಿಗೆ;

ತಡೆ ಹಿಡಿದಿರುವುದು ಗುಡುಗಲ್ಲ ಮಗು

ನಿನ್ನ ಕೊಲ್ಲುತಿರುವುದು ಬಂದೂಕಿನ ನಳಿಕೆಗಳು.

ಅಮ್ಮಾ, ನನ್ನ ಬಿಗಿಯಾಗಿ ಅಪ್ಪಿಕೋ

ನಾ ನಿನ್ನ ನೋಡಲಾರೆ

ಅಮ್ಮ ಹೇಳುತ್ತಾಳೆ ಅವಳಿಗೆ;

ಶಾಂತವಾಗಿರು ಕಂದ,

ನಿನ್ನ ಕಂಗಳಿಂದ ಸಿಡಿಮದ್ದುಗಳ ಹೆಕ್ಕಿ ತೆಗೆಯುವೆ.

ತಾಯಿ ಬಿಕ್ಕುತ್ತಾಳೆ, ಅರಚುತ್ತಾಳೆ..

ಅಮ್ಮನ ಬಿಗಿಯಾಗಿ ಅಪ್ಪಿಕೊಂಡ ಹಿಬಾ

ಅಮ್ಮನಿಗಾಗಿ ಲಾಲಿ ಹಾಡುತ್ತಾಳೆ….

* ವೆರಿನಾಗ್: ಕಾಶ್ಮೀರ ಕಣಿವೆಯ ಒಂದು ಪ್ರಖ್ಯಾತ ಸರೋವರ

(ಕನ್ನಡಕ್ಕೆ: ಜ್ಯೋತಿ ಅನಂತಸುಬ್ಬರಾವ್)

ಇಂಗ್ಲಿಷ್ ಮೂಲ: Countercurrents.org